Forseti Tékklands hrasar í beinni útsendingu, sagður ölvaður

Milos Zeman, forseti Tékklands, var viðstaddur opinbera athöfn í Prag kastala þar sem hann virtist vera búinn að fá sér í tána. Forsetinn var heldur valtur hvort heldur sem hann stóð eða gekk. Fjölmiðlar í Tékklandi hafa gert að því skóna að forsetinn hafi verið hífaður, en slík ályktun er ekki galin af myndskeiði frá athöfninni að dæma. Skrifstofa forsetans hefur neitað þessum ásökunum og haldið því fram að forsetinn hafi verið sýktur af einhverskonar veiru.

Athöfnin átti að vera hefðbundin og felast í því að forsetinn og tveir aðrir embættismenn myndu skoða krúnudjásnin á virðingarfullan hátt. Í myndskeiðinu af athöfninni virðist forsetinn fjarlægur og óviss. Tékkneska blaðið Livové Noviny heldur því fram að forsetinn hafi hrasað um snúru og næstum því dottið í stiga en náð að bjarga sér með því að grípa í stólbak.

Þá hafa myndir birst á netinu sem sýna forsetann í einhverskonar annarlegu ástandi, en athugasemdir við myndirnar gefa í skyn að forsetinn hafi verið drukkinn.

Ekki eru liðnir nema tveir mánuðir frá því að Zeman tók við embætti forseta Tékklands.

Nánar um málið á vefsíðu Washington Post.