Bólusetja fátækustu stúlkurnar

Tvö fjölþjóðleg lyfjafyrirtæki í félagi við alþjóðasamtök á heilbrigðissviði taka þátt í verkefni sem miðar að því að auka vernd milljóna stúlkna í fátækum löndum gegn leghálskrabbameini.

Byrjað verður á verkefnum í átta Asíu- og Afríkulöndum, en þegar upp er staðið á að bólusetja meira en 30 milljónir stúlkna í yfir 40 löndum fyrir árið 2020. Verkefnið er sagt geta haft gífurleg áhrif, sér í lagi þar sem flestar konur látast úr leghálskrabbameini í þróunarlöndum. Bólusett er við HPV-veiru, eða kynfæravörtuveirunni, en smit hennar eykur til muna hættuna á leghálskrabbameini.

GAVI Alliance, samstarfsverkefni opinberra og einkaaðila við að koma bóluefni við barnasjúkdómum til fátækra landa, kynnti verkefnið í gær. „Núna eru mörkuð tímamót í heilsufari kvenna og stúlkna um heim allan,“ sagði dr. Seth Berkley, forstjóri GAVI. „Brúa þarf bilið milli stúlkna í fátækum og ríkum löndum þannig að allar stúlkur njóti verndar gegn leghálskrabbameini, burtséð frá fæðingarstað.“

Til að byrja með útvega lyfjaframleiðendurnir Merck & Co. og GlaxoSmithKline PLC 2,4 milljónir skammta af bóluefni gegn HPV-veirunni, fyrir brot af því verði sem almennt er innheimt fyrir lyfið.