50 fórust í flugslysi í Rússlandi

50 fórust þegar Boeing 737-500 farþegaþota hrapaði á flugvellinum við borgina Kazan í Rússlandi í dag. 44 farþegar voru um borð og sex í áhöfn.

Flugvélin var á vegum Tatarstan flugfélagsins og var að fjúga frá Moskvu til Kazan. Flugstjórar flugvélarinnar voru að reyna að hætta við lendingu þegar flugvélin skall á flugbrautinni með fyrrgreindum afleiðingum.

Samkvæmt vitnum þá lækkaði flugvélin hratt til jarðar og sprungu eldsneytisgeymar þegar flugvélin skall í jörðinni. Flugvélin var 23 ára gömul. Sonur ríkisstjórans í Tatarstan var um borð í flugvélinni og lét hann lífið.

Flugslys eru tíð í Rússlandi og hafa yfirvöld þar í landi ítrekað verið gagnrýnd fyrir skort á flugöryggi. Í apríl á síðasta ári lét 31 farþegi lífið þegar flugvél hrapaði til jarðar stuttu eftir flugtak. Ári áður fórust 44 í svipuðu slysi. Rússland var árið 2010 efst á lista yfir fjölda flugslysa. Þrisvar sinnum fleiri flugslys eiga sér stað í landinu miðað meðaltal í heiminum.

Rússland er stærsta ríki heims og flugsamgöngur nauðsynlegar til að ferðast landshorna á milli. Rússland mun halda vetrarólympíuleikanna snemma á næsta ári í borginni Sochi í suðurhluta landsins.