Segjast gera eins og hinir

Mike Hayden, fyrrverandi yfirmaður bandarísku leyniþjónustunnar CIA og bandarísku þjóðaröryggisstofnunarinnar NSA, segir að hneykslaðir Evrópubúar ættu "fyrst að líta yfir öxlina á sjálfum sér og skoða hvað þeirra eigin stjórnvöld eru að gera," áður en þeir fara að úthúða Bandaríkjamönnum fyrir njósnir.

Þetta sagði hann í sjónvarpsþættinum Face the Nation í gærkvöld, en bætti við að Bandaríkin ættu að útskýra betur fyrir Evrópuríkjum í hverju eftirlitið er fólgið.

"Því meira sem þau vita, því betur líður þeim," sagði Hayden. 

Um helgina upplýstu bæði þýska tímaritið Der Spiegel og breska dagblaðið The Guardian um njósnastarfsemi á vegum Bandaríkjanna í Evrópu, meðal annars í höfuðstöðvum Evrópusambandsins í Brussel. Báðir fjölmiðlarnir vísuðu þar í leyniskjöl, sem uppljóstrarinn Edward Snowden hefur lekið, en hann situr eftir því sem best er vitað enn fastur á flugvelli í Moskvu, vegabréfalaus og óviss um framhaldið.