Hólmfríður: Ég var alveg viss um að Margrét myndi skora

Hólmfríður Magnúsdóttir ógnaði mikið framan af leik og var þá eiginlega sú eina sem var að skapa usla í vörn Norðmanna í Kalmar í kvöld. Í seinni hálfleiknum fékk hún meiri stuðning í sókninni frá liðsfélögum sínum og íslenska liðið náði að jafna og tryggja sér 1-1 jafntefli í sínum fyrsta leik á EM í Svíþjóð.

„Þetta er fyrsta stigið á EM og það er frábært fyrir okkur að ná því. Ég held að við náðum fram íslenska hjartanu í þessum leik. Það var þvílík barátta og við vorum að vinna fyrir hverja aðra. Mér fannst markið alltaf liggja í loftinu því við náðum góðum sóknum og fengum góð færi," sagði Hólmfríður.

„Ég er mjög ánægð með að hafa landað stigi. Ég er samt viss um að ef leikurinn hefði verið tíu mínútum lengri þá hefðum við náð inn sigurmarki," sagði Hólmfríður.

„Það er búin að vera góð stemmning hjá okkur stelpunum. Við komum inn í þetta mót með enga pressu á okkur og það bjóst eiginlega enginn við neinu. Þetta er bara einn leikur sem er búinn núna og það er eins gott að við förum bara að einbeita okkur að næsta leik strax," sagði Hólmfríður.

„Ég fékk alveg nokkur færi en það vantaði hjá mér að klára mitt. Ég var að hlaupa fram og til baka allan leikinn og eyddi líka mikilli orku í varnarvinnu líka. Ég komst oft upp kantinn og hefði kannski getað gert meira," sagði Hólmfríður.

„Þetta var pottþétt víti þegar Sara var felld. Ég er mjög ánægð en vissi alveg að Margrét myndi skora. Ég hugsaði um gærdaginn þegar ég horfði á markvörð Dana verja tvö víti frá Svíunum. Margrét var ekkert að fara að klúðra þessu fyrir okkur. Ég var alveg viss um að hún myndi skora og sagði henni bara að vera róleg," sagði Hólmfríður hlæjandi.

„Næsti leikur er á móti Þýskalandi og við þurfum að undirbúa okkur vel fyrir hann. Nú munum við bara hvíla okkur og fá nudd frá Svölu og Erlu í kvöld og fara að gíra okkur upp í næsta leik. Ég vil taka það fram að ég er rosalega ánægð með íslensku áhorfendurnar sem mættu á leikinn. Það var frábær stemmning og það heyrðist í þeim allan leikinn. Það er mjög mikilvægt fyrir okkur að heyra í þeim," sagði Hólmfríður.