Réttarhöld yfir Mubarak: Dómarar þurftu að þagga niður í lögmönnum

Réttarhöld yfir Hosni Mubarak, fyrrverandi forseta Egyptalands, hófust að nýju í morgun en ekkert varð úr tilraun til að rétta yfir honum í síðasta mánuði, þar sem dómari vísaði málinu til annars dómstóls.

Auk fjármálaspillingar er Mubarak sakaður um að hafa staðið fyrir morðum á hundruðum mótmælenda og stjórnarandstæðinga í Egyptalandi í janúar árið 2011, en þá stóð sem hæst byltingin sem steypti honum af forsetastóli.

Síðasta sumar var hann fundinn sekur um glæpina en áfrýjunardómstóll úrskurðaði síðan að réttað skyldi aftur yfir forsetanum fyrrverandi.

Andrúmsloftið í dómssalnum í morgun var þrungið spennu og þurftu dómarar að biðja lögmenn að hætta frammíköllum svo lesa mætti upp ásakanirnar. Mubarak var í síðasta mánuði fluttur af herspítala í fangelsi þar sem heilsa hans var ekki lengur talin í hættu. Hann mætti þó til réttarhaldanna sitjandi á sjúkrabedda.