Mannskæðar sprengjuárásir í Tyrklandi

Átján létust og ellefu særðust í sprengjum sem féllu á bæinn Reyhanli í Tyrklandi í morgun en bærinn er skammt frá landamærum Sýrlands. Fjölmargir flóttamenn hafa flúið frá Sýrlandi til bæjarins undanfarna mánuði. Samkvæmt BBC heyrðust fjórar sprengingar fyrir hádegi í dag.

Mikil ólga er á svæðinu eftir sprengingarnar en fréttamiðlar í Tyrklandi greina frá því að fólk hafi ráðist á bifreiðar með sýrlenskum númerplötum auk þess sem ráðist var á flóttamenn.

Innanríkisráðherra Tyrklands, Muammer Guler, sagði að rannsókn hæfist strax á árásunum en þetta er í annað skiptið sem mannskæðar árásir verða í Tyrklandi nærri landamærum Sýrlands. Sú fyrri varð í október þegar fimm fórstu í sprengingum í bænum Akcakale.

Utanríkisráðherra Tyrklands, Ahmet Davutoglu, sagði í viðtali við Reuters að enginn ætti að reyna á þolrif þjóðarinnar og að hersveitir landsins myndu grípa til viðeigandi ráðstafana vegna árásanna.