Cody Wilson, 25 ára gömlum laganema í Texas, hefur tekist að búa til skammbyssu með þrívíddarprentara.
Fyrirtæki hans, Defense Distributed, hyggst birta teikningarnar af byssunni á internetinu svo fólk geti prentað út sitt eigið eintak, en eini hluti byssunnar úr málmi er skotpinninn. Er þetta í fyrsta sinn sem byssa af þessu tagi sem hægt er að skjóta úr er gerð, en hún er prentuð úr plasti.
Wilson segist vita að byssan verði notuð til illra verka, en það er hans skoðun að það eitt og sér sé ekki næg ástæða til að setja byssuna, eða öllu heldur teikningarnar af byssunni, í dreifingu. Byssan muni gera ríkjum illkleift að stjórna byssueign almennings.
Þessi nýstárlega uppfinning þykir umdeild og hefur verið gagnrýnd af baráttufólki fyrir hertri skotvopnalöggjöf. Evrópulögreglan Europol segist fylgjast grannt með málinu, en að sögn talskonunnar Victoriu Baines þykja glæpamenn ennþá líklegri til að útvega sér skotvopn upp á gamla mátann.
Myndband BBC þar sem byssan er prófuð er í spilaranum hér að ofan.
Erlent
