Hvað í ósköpunum er Harlem Shake?

Þeir sem fylgst hafa með gangi mála í netheimum undanfarna daga hafa vafalaust rambað á myndbönd sem bera yfirskriftina Harlem Shake.

Öll eru þau keimlík. Þrjátíu sekúndur eða svo að lengd. Manneskja dansar þar einsömul í nokkrar sekúndur en með harkalegri myndvinnslu birtist skyndilega hópur fólks á skjánum, í trylltum dansi.

Uppruna þessa fyrirbæris má rekja til tónlistarmannsins Baaeur en hann birti lagið „Harlem Shake" á myndbandavef Google, YouTube, fyrir nokkru.

Það var síðan snemma í þessum mánuði sem bloggarinn Filthy_ Frank birti myndband við lagið þar sem fjórir karlmenn dansa villtan dans í latex-búningum. Myndbandið fór á flug eftir það en það má sjá hér fyrir ofan.

Það var hins vegar upptæki norskra hermanna sem varð til þess að Harlem Shake vakti heimsathygli. Frá því að myndskeiðið birtist á YouTube hafa hátt í 12 þúsund skopstælingar litið dagsins ljós.

En svo virðist sem netrisarnir Google og Facebook, hafi endanlega jarðað Harlem Shake. Fyrirtækin hafa nú birt sínar eigin útgáfu af skjálftanum. Það má því segja að Harlem Shake sé kominn heilan hring.