„Ekkert haturspasta á mínum borðum takk“

Baráttufólk fyrir réttindum samkynhneigðra á Ítalíu hefur tekið fordómafullum ummælum Guido Barilla, stjórnarformanns Barilla, afar illa.

Fólk hefur verið hvatt til að sniðganga vörur frá Barilla og hefur sá áróður dreifst víðsvegar um heiminn.

Hér á Íslandi vekur eftirtekt að Barilla vörur eru á góðum afslætti víðs vegar í búðum. Á facebook-síðu Barilla eru vörur frá Barilla auglýstar í ýmsum Hagkaupsverslunum og í Krónunni á 25 prósent afslætti.

Þeir sem deila myndinni fara í pott og geta unnið vinninga.

Fjölmargir hafa skrifað neikvæðar athugasemdir við auglýsinguna. Má þar nefna setningar eins og: 

„Ég stend með samkynhneigðum og ætla að finna mér annað pasta.“

„Skítt með mannréttindi, frítt stöff! ...nei djók! Ekkert Barilla fyrir mig takk.“

„Það þýðir ekki að setja bara í gang útsölu og ókeypis og halda að það geti bjargað því að forstjóri Barilla hefur hraunað yfir hinsegin fólk opinberlega. Tökum ekki þátt í svoleiðis afturhaldi. Nei takk ómögulega.“

„Ekkert haturspasta á mínum borðum takk.“

„Spagettíið þeirra er aðeins of "straight" fyrir minn smekk. Vill aðeins meiri fjölbreytileika í pastað mitt.“

Ekki náðist í forsvarsmenn SS sem flytja inn Barilla á Íslandi við vinnslu fréttarinnar.

Á síðu Barilla í Bandaríkjunum hefur komið fram afsökunarbeiðni frá fyrirtækinu og myndband með Guido Barilla þar sem hann biðst afsökunar á ummælunum.