New York rústir einar í myndbandi Norður-Kóreu

Málgagn norður-kóreskra stjórnvalda hefur birt myndband sem sýnir New York-borg sem rústir einar. Þar má sjá ungan mann sem dreymir um að gerast geimfari, í bakgrunni ómar lag Michael Jacksons, „We Are the World." Um miðbik myndbandsins má síðan sjá stórborgina New York í ljósum logum.

Stjórnvöld í Norður-Kóreu hótuðu á dögunum að sprengja kjarnavopn í tilraunaskyni og lýstu því yfir að slíkri tilraun yrði stefnt til höfuðs erkifjendum sínum í Bandaríkjunum.

Myndbandið, sem birtist á veraldarvefnum fyrr í þessari viku, hefur vakið gríðarlega athygli. Upphaflega mátti nálgast það á myndbandavefnum YouTube en bandaríska tölvuleikjafyrirtækið Activision fór seinna fram á að myndbandið yrði fjarlægt af vefsíðunni. Ástæðan er sú að áróðursmenn í Norður-Kóreu notuðu myndefni úr tölvuleiknum Call of Duty þar sem New York-borg hafði orðið fyrir árás hryðjuverkamanna.

Ekki liggur fyrir af hverju Norður-Kóreumenn ákváðu að nota smell Michael Jacksons. Nokkrir hafa bent á að titill lagsins, „We Are the World" sé skírskotun í heimsvaldastefnu Bandaríkjanna.

Hægt er að nálgast myndbandið hér fyrir ofan.