Stefnir í að verkbann verði sett á danska kennara

Sem stendur stefnir allt í að grunn- og leikskólakennarar í Danmörku lendi í verkbanni af hálfu bæjar- og sveitarfélaga landsins í byrjun apríl.

Um 50.000 kennara er að ræða en samningaviðræður milli stéttarfélags þeirra og bæjar- og sveitarstjórnanna eru sigldar í strand. Ekki er deilt um laun heldur vinnutíma. Sem stendur er raunveruleg vinnuskylda kennaranna nokkuð undir þeim 37 tímum á viku sem kveðið er á um í samningum annarra verkalýðsfélaga í landinu.

Sveitar- og bæjarstjórnir Danmerkur vilja breyta kennarasamningunum þannig að þeir fari eftir fyrrgreindri 37 tíma vinnuskyldu en því eru kennararnir alfarið á móti.

Í frétt um málið á vefsíðu danska ríkisútvarpsins segir að ekki sé víst að verkbannið skelli á þótt samband sveitarfélaga í Danmörku hafi haldið blaðamannafund í gær um að það sé í uppsiglingu. Sáttasemjari hafi verið skipaður og stjórn sambands sveitarfélaganna segi að hún vonist til að starf hans leiði til niðurstöðu áður en til verkbannsins kemur.