Vill herða reglur um koffín í anda áfengis og tóbaks

Dr. Jack James, prófessor í sálfræði við Háskólann í Reykjavík, segir koffín leiða til ótímabærra dauðsfalla og að efnið sé hættulegra en flestir geri sér grein fyrir.

Dailymail hefur þetta eftir Dr. James sem hefur sérhæft sig í rannsóknum er varða koffín. Dr. James segist hafa miklar áhyggjur yfir því að koffín sé í auknum mæli notað í orkudrykki, áfenga drykki og lyf. Fyrir vikið sé koffín mun víðar að finna en við gerum okkur grein fyrir. Heilsa fólks sé í aukinni hættu líkt og samfélagið í heild sinni.

Dr. James telur að setja þurfi regluverk um koffín í anda þeirra reglna sem gildi um tóbak og áfengi. Skattleggja þurfi koffín sérstaklega og takmarka sölu á drykkjum sem innihalda efnið til ungmenna.

Koffín er að finna í kaffi og te en einnig í gosdrykkjum, orkudrykkjum, vatni í plastflöskum, áfengjum drykkjum, smákökum, tyggjó, jógúrt og bragðbættri mjólk. Þá er koffín iðulega að finna í kvef- og flensumeðölum, megrunarpillum, sápu og á fleiri stöðum að sögn Dr. James.

Dr. James hefur sérstakar áhyggur fyrir hönd landa sinna í Bretlandi og af frændum þeirra í Bandaríkjunum. Stífara regluverk og betri merkingar á vörum sem innihalda koffín sé að finna víða í Evrópu þar á meðal á Norðurlöndunum.