Hvergi meiri lífsgæði en í Zürich

Zürich, fjölmennasta borgin í Sviss, er sú borg í heiminum þar sem lífsgæði eru mest. Þetta kemur fram í samanburði gagnagrunnsrisans Numbeo.

Zürich var í öðru sæti listans á síðasta ári en þá sat Berlín, höfuðborg Þýskalands í toppsætinu. Berlín er nú í fjórða sæti en tvær borgir í Ástralíu, höfuðborgin Canberra og Adelaide eru í þriðja og fjórða sæti.

Austin, höfuðborg Texas-fylkis, er sú borg í Bandaríkjunum sem kemst efst eða í níunda sæti. Bergen og Þrándheimur skipa 12. og 14. sæti listans. Listann í heild sinni má sjá á heimasíðu Numbeo.

Þar má einnig raða borgunum eftir kaupmætti, öryggi, heilbrigðisþjónustu, mengun og fleiri þáttum. Mestur kaupmáttur er í Doha í Katar, öryggið er mest í Tókýó í Japan, heilbrigðisþjónustan er best í Bangkok á Tælandi, umferðarmenningin best í Canberra í Ástralíu og mengunin mest í Jakarta í Indónesíu.

Numbeo heldur utan um upplýsingar sem fólk sendir að eigin frumkvæði. Ekki er því um hefðbundna skoðunakönnun að ræða og verða niðurstöðurnar að skoðast í ljósi þess.