Segir niðurskurð í velferðarkerfinu heimskulegan

Frjálslyndi demókratinn Tim Farron segir tillögur varnarmálaráðherra um niðurskurð í velferðarkerfinu „hagfræðilega heimskulegar".

Vísar hann þar til orða varnarmálaráðherra Bretlands, Philip Hammond, sem hyggst mótmæla niðurskurði til hermála þar í landi, og beita sér fyrir því að skorið verði frekar niður í velferðarkerfinu.

Segir Hammond að velferðarkerfið ætti að taka á sig stærsta skellinn, enda væri atvinnuleysi óðum að minnka og mun mikilvægara væri að „verja landið og halda uppi lögum og reglu".

Farron sagði í samtali við fréttastofu BBC að sér þætti hugmyndir varnarmálaráðherrans fáránlegar, og að það væri „siðferðislega rangt" að setja meiri fjármuni í hernað í stað þess að „vernda þá sem minna mega sín í samfélaginu".