Hundruð hafa þurft að flýja heimili sín

Hundruð manna hafa þurft að yfirgefa heimili sín vegna flóða og aurskriða í Noregi undanfarna sólarhringa. Einn maður hefur fundist látinn á flóðasvæðinu en ekki er vitað hvernig hann lést.

Ljóst er að tjón af er mikið. Ekkert lát er á rigningu en vandræðin eru að færast til vesturs. Ástandið hefur orðið einna verst í Hvammi í Guðbrandsdal, þar sem nær allir íbúar hafa þurft að yfirgefa heimili sín og aurskriður féllu á þó nokkur hús. Jens Stoltenberg forsætisráðherra fór til svæðisins í gærkvöldi til að sýna stuðning sinn í verki.

Þar var haldinn upplýsingafundur fyrir íbúana. Þrátt fyrir að veðrinu eigi að slota í dag munu fleiri stærri ár flæða yfir bakka sína að mati sérfræðinga. Þær eru seinni að bregðast við rigningu en litlar ár. Samgöngur eru í uppnámi í landinu og fjöldi vega fór í sundur eða er ónothæfur af öðrum sökum. Lestarteinar hafa líka rofnað. Helstu leiðir á milli Óslóar og Þrándheims lokuðust í allan gærdag. Starfsmenn vegagerðar sögðu við norska fjölmiðla í gær að ekki væri hægt að lofa neinu um opnun vega og að ástandið breyttist nánast á hverri mínútu.

Mannabeinum skolaði upp eftir flóðin, en þau voru í gömlum kirkjugarði við kirkju í Listad, sem stóð til ársins 1780. Beinin dreifðust meðal annars yfir vegi og stóð til að hefja hreinsun í gær. thorunn@frettabladid.is