Berklasjúklingum fjölgar í Danmörku

Hinn hættulegi sjúkdómur berklar er að breiðast út að nýju í Danmörku. Þetta veldur dönskum heilbrigðisyfirvöldum miklum áhyggjum því Danir standa almennt í þeirri trú að berklum hefði verið útrýmt í landinu.

Nýjar tölur frá heilbrigðisyfirvöldum sýna að berklasjúklingum í Danmörku hefur fjölgað um 22% frá árinu 2009. Það ár voru þeir 331 talsins en voru orðnir 407 á síðasta ári.

Þessi þróun er þvert á það sem gerst hefur á hinum Norðurlöndunum og í flestum öðrum löndum í Vestur-Evrópu.

Talið er að um tvær milljónir manna látist af völdum berkla árlega í heiminum.