Orðagjálfur Norður-Kóreumanna nær nýjum hæðum

Norður-Kóreumenn eru ævareiðir eftir að Öryggisráð Sameinuðu Þjóðanna samþykkti einróma hertari refsiaðgerðir gegn landinu. Yfirvöld í Norður-Kóreu hafa slitið öllum friðarsamningum við frændur sína í suðri og hóta kjarnorkuárás á höfuðborg Bandaríkjanna.

Yfirlýsingar sem þessar ættu ekki að koma þeim sem fylgst hafa með gangi mála í Norður-Kóreu á óvart. Frá því að Kim Jong-un, sonur og erfingi Kim Jong-il komst til valda á síðasta ári hefur Norður-Kóreu staðið í miklu áróðursstríði við erkifjendur sína í Bandaríkjunum og Suður-Kóreu.

Ráðamenn í Norður-Kóreu hafa eflt hernaðarmátt landsins til muna samhliða því að taka mikilvæg skref í átt að þróun kjarnavopna. Það eru einmitt þessar tilraunir Norður-Kóreumanna með kjarnavopn sem voru tilefni hertari refsiaðgerða Sameinuðu Þjóðanna.

Stuttu áður en atkvæðagreiðsla fór fram um málið í Öryggisráðinu gaf utanríkisráðuneyti Norður-Kóreu út yfirlýsingu þar sem hótað var að varpa kjarnavopni á Washington, höfuðborg Bandaríkjanna. Ályktun Bandaríkjamanna og Kína um auknar þvinganir gegn Norður-Kóreu var síðar samþykkt. Þá gripu yfirvöld í Norður-Kóreu til þess ráðs að slíta öllum friðarsamningum við Suður-Kóreu, þar á meðal er samþykkt frá árinu 1953 sem markaði endalok Kóreustríðsins.

Orðagjálfur Norður-Kóreumanna hefur náð nýjum hæðum undanfarna mánuði. Þeir líta á refsiaðgerðirnar sem óbeina stríðsyfirlýsingu, þannig væri kjarnorkuárás á óvinaríki fyrirbyggjandi aðgerð.

Ekki hafa fengist viðbrögð frá Bandaríkjastjórn um málið. John Kerry, nýskipaður utanríkisráðherra Bandaríkjanna, var spurður á dögunum hvort að körfuknattleiksmaðurinn fyrrverandi Dennis Rodman, sem fundaði með leiðtoga Norður-Kóreu í vikunni, hefði eitthvað um málið að segja. Kerry svaraði á þann veg, að sem diplómati væri Rodman fyrirtaks körfuknattleiksmaður.