Rekin úr lest fyrir söng

Hin 82 ára Emma Anderson frá Miami marðist á öxl og mjöðm þegar öryggisvörður járnbrautarlestar dró hana úr lestinni fyrir söng.

Anderson sat í lestinni og söng lofgjörðarsöngva sér til dægrastyttingar, og lét eins og hún heyrði ekki þegar vörðurinn bað hana um að lækka í sér. Vörðurinn skipaði henni þá að yfirgefa lestina, og þegar hún hlýddi ekki dró vörðurinn hana úr sætinu.

Eftir stutt átök féll Anderson í gólfið og fékk við það fyrrnefnda áverka. Farþegi í lestinni tók myndband af atvikinu með farsíma sínum.

Carlos Gimenez, sýslustjóri Miami-Dade sýslu í Flórída, hefur beðist afsökunar á atvikinu og segir að öryggisvörðurinn hefði átt að sýna meiri skynsemi og aðgát, og lagði áherslu á að starfsmenn sýslunnar yrðu að sýna virðingu fyrir hinum almenna borgara.

Þá sendi talsmaður almenningssamgangna í Miami-Dade frá sér yfirlýsingu og sagði söng Anderson hafa verið truflandi. Reglur kveði á um að farþegar syngi ekki, dansi eða spili á hljóðfæri án tilskilinna leyfa.