Rjóminn af háaðli Bretlands staddur í brúðkaupi í Suður Afríku

Rjóminn af háaðli Bretlands er nú samankominn á safarisetri auðmannsins Sir Richard Branson í Suður Afríku. Ástæðan er það sem breskir fjölmiðlar kalla næstum því konunglegt brúðkaup ársins.

Brúðkaup þetta fór fram í gærdag með mikilli viðhöfn að viðstöddum 300 gestum, allt nánum vinum og ættmennum hinna nýgiftu hjóna. Þau eru Sam Branson sonur Sir Richards og yfirstéttarljóskan Isabella Calthorpe.

Meðal gesta má nefna tvær prinsessur, þær Eugenie og Beatrice, dætur Andrews prins, leikkonuna Kate Winslet og Cressidu Bonas sem er hin nýja kærasta Harry prins.

Cressida er hálfsystir brúðarinnar en Isabella hryggbraut Willian prins bróður Harry fyrir nokkrum árum. Það gerðist eftir að Karl krónprins hafði lýst yfir ánægju sinni með ráðahaginn.

Blóðið sem rennur í æðum Isabellu verður vart blárra í Bretlandi. Móðir hennar er Lady Marie Gaye Curzon dóttir sjötta jarlsins af Howe. Hún á fjóra eiginmenn að baki og eignaðist dóttur með hverjum þeirra.

Raunar hafa ættfræðingar áhyggjur af sambandi Cressidu og Harry því Lady Marie Gaye og Diana prinsessa móðir Harry voru náskyldar.

Sam Branson rekur kvikmyndafyrirtæki sem sérhæfir sig í gerð heimildarmynda.