Friðargæsluliðar teknir sem gíslar við Gólan hæðir

Uppreisnarmenn í Sýrlandi hafa tekið 21 friðargæsluliða sem gísla í grennd við Gólan hæðir á landamærum Sýrlands og Ísrael.

Um er að ræða friðargæsluliða frá Filippseyjum og hafa stjórnvöld á Filippseyjum krafist þess að þeir verði samstundis leystir úr haldi.

Uppreisnarmennirnir segja að þeir muni aðeins gera það ef stjórnarher Sýrlands yfirgefi þorp á Gólan hæðum.

Í frétt um málið á vefsíðu BBC er haft eftir talsmanni utanríkisráðuneytis Filippseyja að verið sé að semja um lausn friðargæsluliðanna. Friðargæsluliðar frá Filippseyjum hafa vaktað þetta svæði allt frá sex daga stríðinu árið 1967.