Eyðileggingin á Filippseyjum

Íbúar á hamfarasvæðunum á Filippseyjum eru nú að reyna að átta sig á umfangi eyðileggingarinnar. Fólk er að kanna rústir heimila sinna og leita í brakinu sem þekur stór svæði við strandirnar.

Stjórnvöld segja að tvær milljónir manna hafi orðið illa úti þegar fellibylurinn Haiyan fór yfir landið fyrir helgi. Talið er að meira en tíu þúsund manns hafi látist, en opinberlega hafa aðeins 250 dauðsföll enn verið staðfest.

Lætin í veðrinu voru slík að heilu skipin þeyttust upp á landi, bílar fuku út á sjó og brýr og bryggjur brotnuðu undan öldugangi.

Um 800 þúsund manns yfirgáfu heimili sín áður en fárviðrið skall á, en margir þeirra urðu samt veðrinu að bráð vegna þess að skólar, kirkjur og stjórnsýslubyggingar sem fólkið leitaði skjóls í eyðilögðust í hamförunum.

Erfitt er að fá skýra mynd af ástandinu vegna þess að net- og símasamband liggur víða niðri, samgönguleiðir hafa lokast og víða engin leið að komast á milli staða.

Hundruð þúsunda manna þurfa á brýnni aðstoð að halda. Matar- og vatnsskortur hrjáir fólk, rafmagnsleysi er víða og ofan á allt er óþefur af rotnandi líkum, sem liggja grafin undir braki, farinn að berast um borgirnar.

Fólk er mikið á ferli að leita að ástvinum sínum og eignum.

„Við þurfum vatn og lyf vegna þess að mikið af fólkinu sem við erum hjá hefur hlotið meiðsli,” hefur AP fréttastofan eftir Eriku Mae Karakot á Leyte-eyju. „Sumir eru með niðurgang og þjást af ofþornun vegna skorts á vatni og mat.”