Eru hársbreidd frá samkomulagi við Írani

John Kerry utanríkisráðherra Bandaríkjanna segir að hársbreidd hafi munað frá því að hægt yrði að gera samning um kjarnorkuáætlun Írans um helgina. Utanríkisráðherrar nokkurra öflugustu ríkja heims hittu þá utanríkisráðherra Írana á fundi í Genf í Sviss þar sem reynt var að útkljá þetta áralanga deilumál.

Fundinum lauk án niðurstöðu en menn hafa heitið að hittast á ný þann 20. þessa mánaðar. Kerry segir að á þeim þrjátíu klukkustundum sem fundahöldin stóðu yfir hafi meira verið rætt en síðustu þrjátíu ár.

Vesturveldin og Ísraelar eru hrædd um að Íranir noti kjarnorkuþekkingu sína til þess að framleiða vopn, en sjálfir segja þeir aðeins ætla að nota tæknina í friðsömum tilgangi.