Airbus bjó til ský úr ösku Eyjafjallajökuls

Airbus flugvélaframleiðandinn bjó í gær til fyrsta manngerða öskuskýjið yfir Biscay-flóa undan ströndum Frakklands. Skýið var búið til úr einu tonni af ösku úr gosinu í Eyjafjallajökli árið 2010, sem lamaði flugumferð um alla Evrópu á sínum tíma.

Með því að búa til svipaðar aðstæður í flóanum var fyrirtækið að kanna hvernig flugvélar þess bregðist við þegar flogið er inn í slíkt ský. Sky fréttastofan greinir frá því að skýið hafi verið um 250 metrar á hæðina og tæpir þrír kílómetrar á breiddina.

Airbus prófaði síðan sérstaka skynjara sem til stendur að setja á vélar fyrirtækisins sem eiga að meta hættuna af því að fljúga inn í slíkt ský, og þykir tilraunin hafa tekist vel.