Sádi-Arabía hrekur innflytjendur úr landi

Erlendir verkamenn í Sádi-Arabíu hafa lengi gegnt lykilhlutverki í atvinnulífi landsins, en eru nú margir anna hvort komnir í fangelsi eða farnir í felur eftir að stjórnvöld ákváðu að láta til skarar skríða gegn þeim.

Afleiðingarnar blasa strax við: Rusl er farið að safnast upp á götunum, matvöruverslanir eru margar lokaðar og smærri verktakafyrirtæki sinna ekki lengur þeim byggingaframkvæmdum sem þau höfðu tekið að sér.

Áratugum saman hafa innflytjendur átt auðvelt með að setjast að í Sádi-Arabíu. Þeir hafa sinnt láglaunastörfum sem heimamenn líta ekki lengur við: Verkamannastörfum, skrifstofustörfum og þjónustustörfum af ýmsu tagi.

Atvinnuleysi hefur hins vegar verið að aukast undanfarið, var komið upp í 12,1 prósent í lok síðasta árs. Stjórnvöld virðast telja að lausnin sé fólgin í því að losna við innflytjendurna, þá losni um störf sem atvinnulausir Sádar geti stokkið í.

Fyrr á þessu ári byrjuðu stjórnvöld að senda frá sér tilkynningar, þar sem innflytjendur eru varaðir við. Hundruð þúsunda hafa þegar verið fluttir úr landi, en sumir fengu frest sem rann svo út í síðustu viku.

Síðan þá hafa 33 þúsund manns verið handteknir, en fjölmargir eru komnir í felur og eftir standa fyrirtækin, sem höfðu reitt sig á starfskrafta þeirra.

„Þetta fólk hefur starfað í þessu landi og blóð þeirra er í steinunum og húsunum,” segir eigandi byggingafyrirtækis í höfuðborginni Ríad í viðtali við AP fréttastofuna. Hann vildi ekki koma fram undir nafni af ótta við hefndaraðgerðir stjórnvalda. „Það er ekki hægt að reka þá burt bara si svona.”