Aðstæður farandverkamanna í Katar hræðilegar

Farandverkamenn sem vinna að uppbyggingu mannvirkja fyrir heimsmeistarakeppnina í fótbolta í Katar árið 2022, vinna við hræðilegar aðstæður og eru misnotaður á marga vegu. Þetta kemur fram í skýrslu Amnesty International sem heitir „Skuggahliðar fólksflutninga“, sem birt var í gær. Við gerð skýrslunnar tóku rannsakendur viðtöl við 210 verkamenn, forsvarsmenn 22 fyrirtækja og embættismenn.

Fólksfjöldi í Katar hækkaði um 10,5% á milli ágústmánaðar 2012 og ágúst á þessu ári, sem samsvarar því að á hverjum klukkutíma fjölgaði um 20 manns í landinu. Þessi fjölgun er að mestu keyrð áfram á innflutningi verkamanna sem vinna að byggingu íþróttavalla, lestarkerfis og hótela svo eitthvað sé nefnt. Alls eru um 1,38 milljón erlendra verkamanna í landinu, eða 94% alls vinnuaflsins.

Rannsókn Amnesty hefur leitt í ljós að þegar verkamennirnir, sem í flestum tilvikum eru karlkyns, koma til Katar eru vinnuaðstæður og skilyrði allt aðrar en lofað var í ráðningarferlinu. Launin er einnig mun lægri og er haldið aftur af launagreiðslum mánuðum saman eða þau jafnvel aldrei útgreidd. Upp komst um tilvik þar sem atvinnurekendur höfðu ekki útbúið nauðsynlega pappíra fyrir verkamennina og yfirvöld geta því handtekið þá hvenær sem er. Einnig hafa vegabréf verið tekin af þeim svo þeir geti ekki yfirgefið landið.

Mennirnir eru neyddir til að vinna gífurlega mikla yfirvinnu við erfiðar aðstæður og heilsa þeirra er ekki tryggð. Einnig búa þeir við hræðileg skilyrði. Sum viðtölin voru tekin við kertaljós og höfðu mennirnir sofið upp á þaki skúranna sem þeir bjuggu í vegna þess að engin loftkæling er til staðar. Hitinn í Katar getur náð gífurlegum hæðum yfir sumartímann.

Þó er það nefnt í skýrslunni að ekki er svo komið fyrir öllum farandverkamönnum og rannsakendur samtakana ræddu við verkamenn sem voru fyllilega ánægðir með aðstæður sínar. Þrátt fyrir það álíta samtökin misnotkunina vera útbreidda í Katar.