Bandaríkjamenn skráðu 33 milljónir símtala í Noregi á einum mánuði

Bandaríska þjóðaröryggisstofnunin, NSA, skráði þrjátíu og þrjár milljónir símtala í Noregi á þrjátíu daga tímabili um áramótin 2012 til 2013. Þetta kemur fram í gögnum sem uppljóstrarinn Edward Snowden lak en hann er nú með tímabundið hæli í Rússlandi. Það er norska Dagbladet sem skýrir frá málinu sem hefur eðlilega vakið mikla athygli þar í landi.

Ekki er um hleranir að ræða, heldur virðast Bandaríkjamennirnir hafa skráð niður símanúmerin sem hringt er í og úr, staðsetningu viðkomandi símtækja og lengd símtalanna.

Jens Stoltenberg, þáverandi forsætisráðherra Noregs segir í samtali við norska ríkisútvarpið í morgun að hann hafi ekki haft hugmynd um að NSA væri að fylgjast með símtölum í Noregi og segir hann afar mikilvægt að fá tilhlýðileg svör frá yfirvöldum í Washington vegna þessa.