Barnsleg kynlífsdúkka tekin úr sölu

Kínverski söluvefurinn DHgate hefur tekið kynlífsdúkku úr sölu í kjölfar mótmæla, en dúkkan lítur út fyrir að vera á barnsaldri.

Á síðunni var dúkkunni lýst sem „fallegri, ungri kynlífsdúkku fyrir karlmenn“ og sögð sveigjanleg. Þá eykur enn á óhugnaðinn að að minnsta kosti 57 dúkkur höfðu verið seldar áður en auglýsingin var fjarlægð, til Bandaríkjanna, Bretlands, Japan og fleiri landa.

Huffington Post greinir frá mótmælum vegna dúkkunnar og var hún sögð ýta undir mansal, barnagirnd og nauðganir, en sérstök mótmælasíða var stofuð á Facebook sem virðist hafa skilað árangri.

DHgate hafa sent frá sér yfirlýsingu vegna málsins og biðjast forsvarsmenn síðunnar afsökunar á að hafa verið með dúkkuna í sölu. Þeir segjast enn fremur ætla að skerpa á notendaskilmálum og sjá til þess að atvikið endurtaki sig ekki.