Skemmdir unnar á minnismerki í Kaíró

Í morgun réðst hópur ungra manna á nýtt minnismerki í Kaíró, sprautuðu á það rauðri málningu og brutu úr því.

Mennirnir skrifuðu með rauðu málningunni ókvæðisorð bæði um Múhamed Morsí, fyrrverandi forseta, og Abdel-Fattah el Sísí herforingja, sem steypti Morsí af stóli í júlí.

Minnismerkið var reist á Tahrír-torginu í Kaíró til minningar um alla þá sem létu lífið í mótmælunum gegn Hosni Mubarak þar á torginu snemma árs 2011.

Minnismerkið var vígt í gær, en skemmdarverkin sýna að engan veginn ríkir sátt í landinu um atburði síðustu missera.