Blandaðar bardagaíþróttir barna vekja óhug

Vinsældir blandaðra bardagaíþrótta færast sífellt í aukanna meðal barna í Bandaríkjunum og er talið að um þrjár milljónir barna stundi íþróttina, allt niður í fimm ára gömul.

Bardagarnir fara fram í járnbúrum og þykja nokkuð hrottalegir, og greinir Daily Mail frá því að í sumum tilfellum berjist börnin án hlífðarbúnaðar.

Barnabardagarnir hafa verið gagnrýndir og sagðir villimannslegir. Áhyggjur hafa skapast af öryggi barnanna og áhrifum íþróttarinnar á hegðun þeirra. Stuðningsmenn sportsins bera það saman við hnefaleika og hefðbundnar bardagaíþróttir og segja íþróttina efla sjálfsaga og vera prýðilega líkamsrækt.

Ljósmyndarinn Sebastian Montalvo ferðaðist um Bandaríkin í von um að varpa ljósi á íþróttina, þá sem hana stunda og foreldra þeirra. Eitt barnanna er hinn sjö ára Kristopher Arrey, en hann þykir grimmur í hringnum og er kallaður Handleggjasafnarinn (The Arm Collector).

Í samtali við fréttastofu CNN segir Montalvo að lykillinn að velgengni sé stuðningur foreldranna. Hann segir þá elska börnin sín skilyrðislaust og vilji aðeins að þau sigri. Hann segir börnin vera látin takast í hendur eftir hvern bardaga, en stuðningsmenn íþróttarinnar segja einmitt að hún kenni börnum að tapa jafnt sem sigra.

„Þetta er frábær leið fyrir þau til að komast í form,“ segir Chris Conolley, kennari blandaðra bardagaíþrótta í Alabamafylki. Hann segir jafnframt að bardagar barnanna séu öðruvísi en fullorðinna og aðaláherslan sé lögð á það að hafa gaman.

„Ég tel að þetta sé hættulegt,“ segir barnalæknirinn Lisa Thornton í samtali við sjónvarpsþáttinn Good Morning America. „Íþróttin getur leitt til meiðsla á hálsi, beinum og liðböndum.“

Þá hefur John McCain, ríkisstjóri Arizona og fyrrverandi forsetaframbjóðandi Repúblikanaflokksins, fordæmt íþróttina. Hann líkir henni við hanaat og skrifaði ríkisstjórum allra fylkja bréf árið 1998 þar sem hann óskaði eftir því að íþróttin yrði bönnuð.

Nánar verður fjallað um málið í kvöldfréttum Stöðvar 2.