Drakk crystal meth fyrir mistök og lést

Breskur karlmaður, Romano Dias, lét lífið eftir að hann drakk vökva sem innihélt eiturlyfið „crystal meth“ í misgripum fyrir heilsudrykk. Daily Mail sagði frá.

Dóttur mannsins hafði borist pakkning sem virtist innihalda einhverskonar ávaxtasafa. Romano hafði drukkið um hálft glas af drykknum þegar honum byrjaði að líða illa og lést hann skömmu síðar.

Sambýliskona mannsins sagði að hann hefði tekið sopa af drykknum og sagt að hann smakkaðist mjög illa og síðan hafi hann sagt að hálsinn væri að brenna. Síðan sagði hann: „Ég er í vandræðum, ég er að deyja, ég er dáinn.“

Á umbúðum drykkjarins stóð að um heilsudrykk væri að ræða en í innihaldslýsinu sagði að hreint methanamfetamín væri í drykknum.

Dóttirin hafði geymt pakkninguna í talsverðan tíma áður en hún tók hana fram og afhenti föður sínum hana. Lögreglan í Bretlandi telur að pakkningin hafi verið send á rangan stað og hafi líklega verið ætluð eiturlyfjasala eða eiturlyfjaframleiðanda.

Lögreglan segir að ekki sé mikið um þetta eiturlyf enn sem komið er í Bretlandi en þetta sé hugsanlega merki um að það eigi að reyna að setja það á markað þar í landi.

Íslendingar þekkja lyfið crystal meth líklega best úr sjónvarpsþáttunum Breaking Bad sem fjallar um efnafræðikennara sem byrjar ásamt ungum manni að framleiða eiturlyfið.

Efnið Crystal Meth er ekki mjög þekkt hér á landi. Efninu er lýst sem mjög sterku amfetamíni. Efnið er yfirleitt annað hvort reykt eða það sniffað eða því er sprautað inn. Efnið hefur slæm áhrif á mannslíkamann, það eykur hjartslátt, hækkar blóðþrýsting og líkamshita. Afleiðingar inntöku efnisins geta verið kvíði, skapsveiflur, ofsóknarkennd og fleira.