Vilja fá tilboð með sjö núllum

Alfreð Finnbogason fékk að vita af því í kvöld að hann mætti fara í viðræður við enska úrvalsdeildarliðið Cardiff City en þetta kemur fram í viðtali við Gaston Sporre, íþróttastjóra Heerenveen, á heimasíðu Voetbal í kvöld.

„Alfreð má ræða við velska félagið en við viljum frekar að hann spili áfram með okkur," sagði Gaston Sporre. Heerenveen hefur þegar hafnað tilboðum frá skoska liðinu Celtic (2.5 milljónir evra) og þýska liðinu FC Augsburg (4.5 milljónir evra) samkvæmt fréttinni í Voetbal.

„Það er tvennt í stöðunni. Annaðhvort er Cardiff full alvara í að vilja kaupa Alfreð eða hann verður áfram hjá SC Heerenveen. Við viljum frá tilboð með sjö núllum og Cardiff veit að því," sagði Sporre.

Alfreð hefur skorað sex mörk í fyrstu fjórum umferðunum og er langmarkahæstur í hollensku úrvalsdeildinni. Hann skoraði tvö mörk á móti Ajax um síðustu helgi.