Vesturlönd búa sig undir hernað í Sýrlandi

Stjórnvöld í Bandaríkjunum og víðar á Vesturlöndum eru nú í óða önn að búa sig undir hugsanlegan hernað í Sýrlandi vegna efnavopnaárásar í úthverfum Damaskusborgar í síðustu viku.

John Kerry, utanríkisráðherra Bandaríkjanna, sagði í gærkvöld engan vafa leika á því að efnavopn hafi verið notuð í Sýrlandi í síðustu viku og allt mannkyn verði nú að taka höndum saman um að draga þá til ábyrgðar, sem stóðu að þeirri árás, og tryggja að slíkt gerist aldrei aftur.

Og breska stjórnin ætlar síðar í dag að taka ákvörðun um hvort þingið verði kallað sérstaklega saman til að ræða og hugsanlega veita stjórninni heimild til hernaðar.

Sýrlandsstjórn sakar Bandaríkin um að vilja ekki bíða eftir niðurstöðum úr rannsókn efnavopnaeftirlits Sameinuðu þjóðanna á vettvangi heldur vera staðráðin í að notfæra sér þetta tilefni til að hefja árásir. Sýrlendingar muni hins vegar verjast með öllum tiltækum ráðum.

Bæði Rússar og Kínverjar hafa tekið illa í hugmyndir um að ráðast gegn Sýrlandsstjórn með hervaldi.

Kínverjar segja ástandið nú minna á aðdraganda Íraksstríðsins: Vesturlönd fari of geyst í að draga ályktanir um það hverjir beri ábyrgðina.

Og Rússar hvetja Vesturlönd til að sniðganga ekki Öryggisráð Sameinuðu þjóðanna, en á þeim vettvangi hafa bæði Rússar og Kínverjar til þessa staðið gegn því að gripið verði til aðgerða gegn Sýrlandsstjórn.

Rannsóknarteymi frá Sameinuðu þjóðunum hóf í gær rannsóknir á vettvangi í úthverfum Damaskusborgar í gær í von um að geta staðfest að efnavopn hafi í raun og veru verið notuð, og fá hugsanlega einnig botn í það hver notaði þau.

Rannsóknarhópurinn hyggst halda rannsóknum sínum áfram í dag, en utanríkisráðherra Sýrlands fullyrti í morgun að tafir hafi orðið á því vegna innbyrðis deilna í röðum uppreisnarmanna.