Mjög vonsviknar með að hafa ekki unnið þær síðast

Það hefur mikið breyst hjá Söru Björk Gunnarsdóttur á þeim fjórum árum síðan að íslenska landsliðið tók þátt í EM í fyrsta sinn. Sara Björk var þá að stíga sín fyrstu skref með landsliðinu en er núna kominn í algjört lykilhlutverk í liðinu.

„Ég var 18 ára þegar ég tók þátt í síðasta stórmóti. Ég hef þroskast mikið sem leikmaður á þessum tíma. Ég var að spila á Íslandi þá en er núna á þriðja ári í atvinnumennsku í Svíþjóð. Ég hef bætt mig mikið sem leikmaður og vona að ég geti gert meira fyrir liðið heldur en á síðasta móti. Mér finnst ég líka vera í meira ábyrgðarhlutverki og bera meiri ábyrgð á liðinu. Ég hlakka bara til að spila," sagði Sara á blaðamannafundi í gær.

Sara er varafyrirliði liðsins og hefur borið fyrirliðabandið í forföllum Katrínar Jónsdóttur.

„Það er heiður að fá að taka við fyrirliðabandinu þegar Katrín hefur ekki verið með. Siggi treysti mér fyrir þessu hlutverki og ég er rosalega stolt af því að hafa fengið það," segir Sara.

Íslenska liðið tapaði naumlega fyrir Noregi þegar liðin mættust síðast í hreinum úrslitaleik um sigur í riðlinum í undankeppni EM. Íslenska liðið komst síðan á EM í gegnum umspilið.

„Þetta var úrslitaleikur, við spiluðum vel og vorum mjög vonsviknar með að hafa ekki unnið þann leik. Við komumst áfram á EM og það er það sem skiptir máli. Svo er bara að spila aftur við þær og þá erum við ekkert að hugsa um fyrri úrslit," segir Sara. Framundan er leikur á móti Noregi í Kalmar í kvöld.

„Ég er mjög spennt og það er mikil spenna komin í hópinn. Við getum eiginlega ekki beðið eftir því að fá að spila," segir Sara og hún telur að liðinu gangi betur að stjórna spennnustiginu í ár heldur en í Finnlandi fyrir fjórum árum.

„Það var fyrsta stórmótið okkar og við höfum lært mikið af því. Við erum með marga leikmenn sem spiluðu á síðasta móti og allar eru reynslunni ríkari eftir það mót," segir Sara en hvað með leikinn í kvöld?

„Þetta verður mjög harður leikur. Það er mikilvægt fyrir okkur að fá þrjú stig úr leiknum og bæði lið þurfa á þremur stigum að halda. Þetta verður hörkuleikur. Það er mjög mikilvægt að byrja mótið og þrjú stig myndu hjálpa okkur rosalega að ná okkar markmiði."