Katrín: Spila bara haustleikina ef að það er mikil neyð

„Þetta er klárlega með þeim stærstu landsleikjum sem ég hef spilað. Þetta er gríðarlega mikilvægur leikur enda erum við komnar í átta liða úrslit með sigri," sagði Katrín.

Hún var spurð út í sigurleik á móti Hollandi árið 1994 sem var hennar annar landsleikur. Íslenska kvennalandsliðið komst þá í átta liða úrslit Evrópukeppninnar í fyrsta sinn en þá var úrslitakeppnin aðeins skipuð fjórum liðum.

„Það gleymist stundum að tala um þennan árangur því þessar stelpur sem voru í landsliðinu á sínum tíma voru gríðarlega flottar og góðar. Ég get ekki sagt að ég hafi átti mikinn þátt í þessu. Ég kom þarna inn á í mínútu og fannst það ógeðslega gaman. Það voru stelpur í liðinu sem ég leit mikið upp til," sagði Katrín.

En er Katrín var fara að spila upp á það að leikurinn á móti Hollandi í dag verði ekki hennar síðasti landsleikur?

„Ég er ekki mikið að hugsa um það. Ég ætla að spila með Umea út tímabilið. Mér finnst eðlilegt þegar að það byrjar ný keppni í haust að það séu bara nýir leikmenn sem taki við. Við eigum frábæra leikmenn sem eru að koma inn í þetta hjá okkur," segir Katrín. Hún verður til taks í haustleikjunum en stefnir ekki á að spila.

„Ef að það er einhver nauðsyn þá gæti ég spilað leikina í haust. Við eigum flottar stelpur sem geta leyst þessa stöðu vel. Það þyrfti þá að vera í mikilli neyð," segir Katrín.

„Það er alltaf eitthvað um meiðsli fyrir svona leiki. Mér finnst við vera með sterkan hóp og það er gríðarlegur vilji í öllum leikmönnum. Ég finn bara rosalega kraft frá öllum í hópnum og við ætlum að fara áfram. Þá verður við að vinna þennan leik," segir Katrín.

„Þær eru með pínulítið öðruvísi lið en við en ég vil samt meina að á góðum degi þá getum við vel unnið Holland. Í þessum leik mun þetta snúast um dagsformið og viljann," segir Katrín.