Ætlum ekkert að vera bara með, við ætlum áfram

Ísland fær ærið verkefnið í 8-liða úrslitum Evrópukeppninnar í Svíþjóð en liðið mætir heimamönnum fyrir framan troðfullan völl í Halmstad.

Það kom til hlutkestis í gær milli Dana og Rússa um það hvort liðið færi áfram í keppninni. Peningurinn var með grönnum okkar í liði og fóru Danir áfram í 8-liða úrslitin.

Draumaleikur fyrir stelpurnar okkar framundan í Svíþjóð. Ísland mætir Svíþjóð klukkan eitt á sunnudaginn og má fastlega gera ráð fyrir því að völlurinn í Halmstad verði fullur en uppselt hefur verið á alla leiki Svía á mótinu til þessa.

„Þetta er algjör draumadráttur fyrir okkur,“ sagði Margrét Lára Viðarsdóttir, leikmaður íslenska landsliðsins, í samtali við Fréttablaðið rétt eftir hlutkestið.

„Svíþjóð og Frakkar eru bæði með frábær lið en það verður mun skemmtilegra fyrir okkur að mæta heimamönnum fyrir framan fullan völl í Halmstad. Við erum margar að spila hér í Svíþjóð sem gerir þetta enn sætara.“

En eru stelpurnar okkar orðnar saddar?

„Ég tel að við eigum í raun meiri möguleika í Svíana og við erum alls ekki að fara mæta í þennan leik til þess eins að vera með, við ætlum okkur að sjálfsögðu að vinna heimamenn og komast í undanúrslitin. Þetta verður bara mögnuð upplifun og stærsta stund allra í liðinu. Ég get trúað því að Svíarnir eigi eftir að vanmeta okkur töluvert á sunndaginn og við verðum bara að nýta okkur það.“

Stuðningur þjóðarinnar nær til leikmanna.

„Það er frábært að finna fyrir öllum þeim stuðningi sem við erum að fá frá Íslandi og það gefur okkur mikinn kraft fyrir komandi leik. Við ætlum okkur að halda áfram að skrifa söguna.“