Á yfir höfði sér ákærur vegna misnotkunar

Kaitlyn Hunt, átján ára gömul stúlka frá Flórída í Bandaríkjunum, á yfir höfði sér tvær ákærur vegna kynferðislegrar misnotkunar á fimmtán ára stúlku. Málið hefur vakið mikla athygli vestanhafs þó fjölmiðlar hafi lítið fjallað um það fram að þessu.

Foreldrar fimmtán ára kærustu Kaitlyn kærðu hana þegar upp komst um samband stúlknanna og var hún handtekin í kjölfarið þann 16. febrúar.

„Þetta fólk reyndi aldrei að hafa samband við okkur,“ segir móðir Kaitlyn um foreldra kærustunnar, og sagðist ekki hafa haft hugmynd um að þau væru mótfallin sambandinu. „Þau telja að dóttir mín hafi snúið dóttur þeirra til samkynhneigðar.“

Foreldrar hinnar stúlkunnar reyndu einnig að láta reka Kaitlyn úr skólanum, og þrátt fyrir að stjórn skólans hafi hafnað því og dómari hafi veitt Kaitlyn leyfi til að klára önnina, tókst foreldrafélagi skólans að bola henni burt rétt fyrir útskrift.

Segir móðir Kaitlyn að stúlkurnar hafi hafið sambandið í byrjun skólaársins og foreldrar beggja hafi vitað af því löngu áður en kæran var lögð fram.

Hefur Kaitlyn verið boðið að sleppa við fangelsisvist gegn því að hún verði í stofufangelsi í tvö ár og á skilorði í eitt.

Netverjar hafa hópast saman í stuðningi sínum við Kaitlyn, þar á meðal aktívistasamtökin Anonymous, sem sendu frá sér tilkynningu til yfirvalda í Flórída.

„Kaitlyn Hunt er klár, ung stúlka sem var í sambandi við aðra stúlku með beggja samþykki, á meðan þær voru báðar undir lögaldri. Hún á framtíðina fyrir sér og það er fjöldi fólks, í raun þúsundir, sem munu ekki láta ykkur komast upp með að eyðileggja það með ömurlegum og handahófskenndum vinnubrögðum.“