Beitti kærustuna ofbeldi og braut nálgunarbann

Leikarinn Edward Furlong var handtekinn á fimmtudag í Los Angeles vegna gruns um að hafa brotið nálgunarbann á fyrrverandi kærustu hans sem honum var gert að sæta.

Er leikarinn sagður hafa falið sig fyrir lögreglu þegar hún kom á vettvang.

Hann var svo látinn laus á laugardag gegn 100 þúsund dala tryggingu, en í janúar síðastliðnum var hann ákærður fyrir að beita fyrrverandi kærustu sína líkamlegu ofbeldi.

Hafa bæði fyrrverandi kærasta hans og fyrrverandi eiginkona fengið á hann nálgunarbann, en leikarinn var árið 2010 dæmdur í sex mánaða fangelsi fyrir að brjóta nálgunarbann sem á hann var sett.