Svikamiðill sagði ósatt um afdrif Amöndu Berry

Sótt er að miðlinum Sylviu Browne þessa dagana. Hún hafði sagt við móður Amöndu Berry, sem var rænt og haldið nauðugri í Cleveland, að dóttir hennar væri látin.

Það var skömmu eftir hvarf Amöndu sem móðir hennar leitaði til miðils. Á þeim tíma var ekkert vitað hvað orðið hafði um Amöndu. Eftir að Amanda kom í leitirnar var Sylvia Browne spurð út í fullyrðingar sínar um andlát Amöndu.

„Ég hef oftar haft rétt fyrir mér en rangt fyrir mér. Sennilegast hef ég aldrei verið jafn fegin að hafa haft rangt fyrir mér og í þessu tilfelli. Aðeins guð hefur alltaf rétt fyrir sér,“ sagði Browne, eins og ekkert hefði í skorist.