"Nú er loksins að birta til"

Aesha Mohammadzai vakti heimsathygli árið 2010 þegar hún sat fyrir á forsíðu tímaritsins Time eftir að eiginmaður hennar skar af henni nefið.

Árásinni varð hún fyrir í heimalandi sínu, Afganistan, en eiginmaður hennar hafði beitt hana ofbeldi frá því faðir hennar gaf honum hana þegar hún var aðeins tólf ára gömul. Það gerði faðir Aesha til að greiða manninum, talíbönskum hermanni, skuld.

Að lokum flúði Aesha frá manninum en þegar hún náðist var henni refsað grimmilega. Eiginmaður hennar og tengdaforeldrar skáru af henni nef og eyru, og skildu hana eftir úti í skógi. Hún náði naumlega að skríða heim til afa síns sem kom henni undir læknishendur. Flogið var með Aesha til Bandaríkjanna árið 2010, og nú býr hún hjá fjölskyldu í Maryland.

Aesha hefur farið í fjölmargar lýtaaðgerðir á nefi, sem hafa tekið allt að átta klukkustundir. Læknum hefur tekist að móta nef úr umframvef frá enni hennar og framhandlegg. Aðeins nokkrar minniháttar aðgerðir eru eftir, og að þeim loknum munu læknar freista þess að búa til eyru.

Bandaríska sjónvarpsstöðin CNN fjallar um Aesha í dag. Hún segist hafa þjáðst mikið um ævina en nú sé loksins að birta til.

Myndbrot úr umfjölluninni má sjá í spilaranum hér fyrir ofan.