Landamærum lokað vegna þingkosninga í Pakistan

Landamærum Pakistan að Afganistan og Íran hefur verið lokað og gríðarlegur viðbúnaður er við kjörstaði í Pakistan vegna þingkosninga í landinu.

Ellefu létust í sprengjuárás í Karachi í morgun, en kjörstaðir opnuðu klukkan þrjú í nótt að íslenskum tíma og áttu að loka síðdegis. Ákveðið hefur verið að lengja tímann til þess að kjósa um eina klukkustund.

30 prósent landsmanna hafa kosið og bjartsýnustu menn vona að kjörsóknin verði á bilinu 60 til 80 prósent í lok dags. Í þingkosningum árið 2008 var kjörsóknin ekki nema 44 prósent. Talibanar hafa hótað sjálfsmorðsárásum á kjörstaði og því er afar ströng gæsla í kringum staðina. Hátt í 90 milljónir eru á kjörskrá og eru 342 þingsæti í boði.