Tyrkir ætla að grípa til nauðsynlegra aðgerða til þess að tryggja öryggi

Tyrkir ætla að grípa til nauðsynlegra aðgerða til að standa vörð um eigið öryggi, eftir að minnst 43 létust og á annað hundrað særðust í tveimur bílsprengjum í bænum Reyhanli í gær.

Bærinn er staðsettur nálægt landamærum Sýrlands og sagði aðstoðarforsætisráðherra Tyrklands, Besir Atalay, að sprengjumennirnir væru líklega frá Tyrklandi en með sterk tengsl við sýrlensk stjórnvöld.

Yfirvöld þar í landi hafa neitað að bera ábyrgð á árásinni en Tyrkir hafa stutt andspyrnuna í Sýrlandi og gagnrýnt stjórn forsetans, Bashar al-Assad.

Fjöldi sýrlenskra flóttamanna hefur komið til Reyhanli síðan átökin hófust í Sýrlandi og eftir árásirnar í gær var nokkuð um árásir heimamanna á Sýrlendinga í bænum og bifreiðar með sýrlenskar númeraplötur.