Nawaz Sharif búinn að lýsa yfir sigri

Nawaz Sharif, leiðtogi Múslimabandalagsins og fyrrverandi forsætisráðherra Pakistans, fagnaði í gærkvöldi með stuðningsmönnum sínum eftir að hann lýsti yfir sigri í þingkosningum sem fram fóru í landinu í gær.

Flokknum hafði verið spáð sigri og leit út fyrir að hann hefði komist nálægt því að ná hreinum þingmeirihluta.

Flokkurinn hefur verið í stjórnarandstöðu frá árinu 2008 en Sharif verður nú forsætisráðherra í þriðja sinn. Kosningarnar í gær voru sögulegar fyrir þær sakir að aldrei áður hafa lýðræðislega kjörin stjórnvöld tekið við landinu tvö kjörtímabil í röð án afskipta hersins og var kosningaþátttaka með ágætum þrátt fyrir hótanir talibana um ofbeldi og árásir sem gerðar voru.

Talsmenn kosninganna vonuðust í gærkvöldi til að þáttaka hefði verið um 60-80%, en árið 2008 kusu aðeins 44% kosningabærra manna. Sharif hvatti leiðtoga allra flokka til að setjast að samningaborði með sér og vinna að lausnum á vandamálum landsins.