Kosningar í Búlgaríu - hætta á stjórnarkreppu

Gengið er til kosninga í Búlgaríu í dag. Hægrimenn og sósíalistar eru hnífjafnir í skoðanakönnunum og óttast stjórnmálaskýrendur að það gæti orðið til þess að hvorugur flokkur nái að mynda meirihluta.

Eftir kröftug mótmæli í febrúar gegn fátækt og spillingu sagði ríkisstjórn landsins undur forystu hægri manna í GERB flokknum af sér. Búlgaría er fátækasta landið í Evrópusambandinu. Atvinnuleysi hefur ekki verið meira þar í átta ár og einn af hverjum fjórum er undir fátæktarmörkum. Þetta hefur skiljanlega sett mark sitt á stjórnamálumræðuna í aðdraganda kosninganna, ekki síður en áhyggjur kjósenda af mikilli spillingu í stjórnsýslunni.

Tveir flokkar eru hnífjafnir í könnunum. Sósíalistar og hægri menn í GERB flokknum. Sóslíalistar lofa aukinni eyðslu hins opinbera í von um að örva hagvöxt og minnka atvinnuleysi en hægri menn lofa hins vegar að lækka skuldir hins opinbera og auknum stöðugleika.

Fari úrslitin á þann veg sem kannanir benda til gæti stjórnarkreppa fylgt í kjölfarið vegna erfiðleika við að mynda starfhæfan meirihluta á þinginu. Stjórnmálaskýrendur segja að fari svo þyrfti jafnvel að kjósa á nýjan leik.

Það flækir málin enn frekar að í gær lagði lögreglan hald á 350 þúsund ólöglega kjörseðla og er óttast að reynt verði að svindla í kosningunum í landinu. Þá kom fram í könnun sem var framkvæmd í landinu að tólf prósent kjósenda væru tilbúnir að selja atkvæði sitt hæstbjóðanda.