Yfir 250 eftirlitsmenn fylgjast með kosningum í Búlgaríu

Yfir 250 alþjóðlegir eftirlitsmenn fylgjast nú með kosningunum í Búlgaríu en um sjö milljónir manna ganga að kjörborðinu í dag. Mikil ólga er í kringum kosningarnar, ekki síst eftir að 350 þúsund falsaðir kosningaseðlar fundust í prentverksmiðju skammt frá höfuðborg Búlgaríu, Sófíu, í gær.

Þá hafa 12 prósent kjósenda játað því í könnunum að þeir séu tilbúnir að selja atkvæði sitt hæstbjóðanda.

Hægrimenn og sósíalistar eru hnífjafnir í skoðanakönnunum og óttast stjórnmálaskýrendur að það gæti orðið til þess að hvorugur flokkur nái að mynda meirihluta. Eftir kröftug mótmæli í febrúar gegn fátækt og spillingu sagði ríkisstjórn landsins, undir forystu hægri manna í GERB flokknum, af sér.

Fréttamaður sem fréttastofa breska ríkisútvarpsins ræddi við sagði að svo virtist sem engin hefði raunverulegan áhuga á að vinna kosningarnar. 36 flokkar hafa boðið sig fram til þings en aðeins þrír virðast ætla að ná 4% markinu sem þarf til þess að komast inn á þing.

Talið er að kjörsókn nái ekki 50 prósentum.