Myrtur á hrottafenginn hátt af vinum sínum er hann kom út úr skápnum

23 ára rússneskur maður var myrtur á hrottafenginn hátt af vinum sínum eftir að hafa sagt þeim frá því að hann væri samkynhneigður.

Talið er að atburðarásin hafi verið sú að maðurinn sat ásamt tveimur vinum sínum við drykkju og ákvað að tjá þeim að hann væri samkynhneigður. Að svo búnu réðust mennirnir að sögn á hann og afklæddu hann. Þá létu þeir hann ganga um nakinn og niðurlægðu manninn. Mennirnir tveir veittu honum ýmsa áverka og misþyrmdu honum kynferðislega með bjórflöskum. Þá skáru þeir með eggvopni í kynfæri fórnarlambsins en fórnarlambið var meðvitundarlaust eftir atganginn.

Mennirnir ákváðu þá að myrða fórnarlambið svo að það yrði ekki til frásagnar um árásina og gerðu það með því að kremja á honum höfuðið með 20 kílóa steini. Atgangurinn var slíkur að lögregluyfirvöldum reyndist erfitt að bera kennsl á lík mannsins.

Tveir menn eru í haldi lögreglu vegna málsins en þeir eru sagðir tengjast gengi sem fyrirlítur samkynhneigð. Yfirvöld í Rússlandi hafa lýst því yfir að um sé að ræða hatursglæp gagnvart samkynhneigðum, sem telst óvenjulegt í ljósi þess að rússnesk yfirvöld hafa verið afturhaldssöm þegar kemur að málefnum samkynhneigðra. Yfirmaður rannsóknarinnar sagði í kjölfar manndrápsins: „Hvatinn fyrir morðinu var óhefðbundin kynhneigð fórnarlambsins."

Sjá frétt um málið á RT.com