Nauðlenti vegna farþega sem söng látlaust lög eftir Houston

Flugstjóri American Airlines þurfti að nauðlenda vél félagsins í Kansas, eftir að kona um borð hafði boðið upp á einsöng á laginu „I will always love you" með Whitney Houston og neitað að láta af söngnum þrátt fyrir ítrekaðar beiðnir farþeganna og flugstjórans.

Vélin fór í loftið frá Los Angeles og var förinni heitið til New York. Flugdólgurinn hóf upp raustina skömmu eftir flugtak og aðrir farþegar urðu fljótt þreyttir á flutningnum, eðlilega. Eftir um þriggja tíma flug þar sem konan hafði nánast viðstöðulaust kyrjað lagið þurfti flugstjórinn að sveigja af leið og lenti að því búnu í Kansas.

Eftir lendinguna komu lögreglumenn um borð og handtóku konuna, sem gafst ekki upp á söngnum þrátt fyrir handtökuna. Atvikið náðist á myndband.