Krefjast sex ára fangelsisvistar til handa Berlusconi

Handhafar ákæruvaldsins á Ítalíu fóru á mánudaginn fram á að Silvio Berlusconi, fyrrum forsætisráðherra Ítalíu, yrði dæmdur í sex ára fangelsi fyrir misnotkun í opinberu starfi og fyrir að greiða fyrir kynmök með ólögráða stúlku.

Handhafar ákæruvaldsins gerðu einnig þá kröfu að Berlusconi yrði bannað að gegna embættisstörfum á Ítalíu fyrir lífstíð. Berlusconi er gefið að sök að hafa stundað mök við ólögráða stúlku að nafni „Ruby" og hafa til viðbótar misbeitt valdi sínu til að frelsa hana úr haldi lögreglu.

Berlusconi og stúlkan neita bæði að þau hafi stundað kynmök og fyrrum forsætisráðherrann segir málið vera tilraun vinstrisinnaðra saksóknara til að bola sér úr embætti.

Aðalsaksóknarinn í málinu, Ilda Boccasini, segir „engan vafa" leika á því að Ruby væri vændiskona og hefði stundað mök við Berlusconi. Saksóknarinn mótmælti harðlega ýmsum rökum verjenda Berlusconis. Berlusconi hefur statt og staðfastlega haldið því fram að hann hafi beitt sér fyrir því að stúlkan yrði látin laus úr haldi lögreglu í maí 2010 vegna þess að hann hafi talið að hún væri frænka þáverandi forseta Egyptalands, Hosni Mubarak. Berlusconi segist með þessu athæfi sínu hafa viljað koma í veg fyrir vandræði í samskiptum landanna. 

Saksóknarinn gaf ekkert fyrir þessar skýringar og sagði Berlusconi vita „full vel að um haugalygi væri að ræða og hann vissi vel að stúlkan væri ólögráða, frá Marokkó, hefði strokið frá unglingaheimili og hafði áhuga á fyrrum forsætisráðherranum." Saksóknarinn hélt því einnig fram að ýmis vitni sem verjendurnir hefðu leitt fyrir réttin hefðu logið. Ummæli saksóknarans reiddu einn lögmann Berlusconis til mikillar reiði.

Berlusconi sagði að málið væri ávöxtur „fordóma og haturs." Berlusconi sagði að auki málið vera: „Kenningar, sögusagnir, útúrsnúningar, lygar byggðar á fordómum og hatri, þvert á sönnunargögnin."

Nánar er fjallað um málið á ítölsku fréttaveitunni ANZA.it.