Þakið hrundi í fataverksmiðju

Tveir létust og sjö slösuðust þegar þak fataverksmiðju í Phnom Penh, höfuðborg Kambódíu, hrundi í gær.

Um fimmtíu manns voru í húsinu þegar þakið hrundi, en það hýsir verksmiðju sem framleiðir Asics-íþróttaskó. Talið er að þung tæki úr járni sem geymd voru á veikbyggðu þakinu hafi valdið því að það hrundi.

Slæmur aðbúnaður í fataverksmiðjum í Asíu hefur verið í brennidepli undanfarið, en yfir þúsund létust þegar átta hæða verksmiðjubygging í Bangladess hrundi í síðasta mánuði. Voru flestir þeirra starfsfólk í fataverksmiðjum.