Karlkyns fatafella kemst í hann krappan

Karlkynsfatafella frá Wales mætti fyrir rétt nýlega en hann hefur verið kærður fyrir að ráðast á þrjár konur sem púuðu hann af sviðinu á kvennakvöldi.

Leon Zbudowskyj hljóp í skarðið fyrir starfsbróður sinn, hinn vöðvaða Fabíó, í nektarsýningu á kvennakvöldi sem fór fram á welskri krá. Meira en 150 konur höfðu borgað sig sérstaklega inn til að sjá buffið Fabio fara úr hverri spjör, tvö þúsund krónur hver, og urðu ekki par ánægðar þegar viðvaningurinn Leon mætti á sviðið.

Þrátt fyrir að hann kæmi fram klæddur sem slökkviliðsmaður tókst honum ekki að heilla konurnar á Baltic Inn kránni, sem er staðsett nálægt Llanelli í Suður-Wales. Og þær fóru að púa á Leon og gera hróp að honum. Vitni í hópi kvennanna lýstu Leon sem ósnyrtilegum, vöðvarýrum og hreyfingarnar væru síður en svo til að hrópa húrra fyrir. Hann var með öðrum orðum allt annað en sjá mátti á kynningarplakötum af Fabio, en sá hafði afboðaði sig á síðustu stundu og umboðsskrifstofan sendi Leon í staðinn.

Herra Zbudowskyj átti að fá þrjátíu þúsund krónur fyrir atriðið, mætti sem slökkviliðsmaður en fékk kaldar kveðjur. Hann brást ókvæða við hrópum kvennanna og réðst að sögn á þrjár konur og braut glös þeirra. Fimm lögreglumenn mættu og handtóku Zbudowskyj.